නිධානයකින් ගත් බව කියන පුරාවස්තු රැසක් සමඟ තිදෙනෙක් අත්අඩංගුවට

panadura-incident

නිධානයකින් ලබාගත් බවට සැක කෙරෙන පුරාවස්තු රැසක් විකිණීම සඳහා ළඟ තබාගෙන සිටි සැකකරුවන් තිදෙනෙකු පානදුර මධ්‍යම දූෂණ මර්දන ප්‍රහාරක ඒකකය විසින් පෙරේදා (22දා)අත්අඩංගුවට ගත් බව පොලිස් මූලස්ථානය සඳහන් කරයි. පානදුර මධ්‍යම දූෂණ මර්දන ප්‍රහාරක ඒකකයේ නිලධාරීන්ට ලද තොරතුරකට අනුව කළුතර ප්‍රදේශයේ පිහිටි හෝටලයක රථගාලක් අසල සිදුකළ වැටලීමකදී එම සැකකරුවන් අත්අඩංගුවට ගත් බවද පොලිස් මූලස්ථානය පෙන්වා දෙයි. මෙම ජාවාරම මෙහෙයවන ලද ප්‍රධාන සැකකරු සෞඛ්‍ය හේතු මත යුද හමුදාවෙන් විශ්‍රාම ගැන්වූ සෙබළෙකු බවට හඳුනාගෙන තිබෙන බවත්, එම  සැකකරු 34 හැවිරිදි මොරගහකන්ද ප්‍රදේශයේ පදිංචිකරුවෙකු බවත් සඳහන් වෙයි.

අනෙක් සැකකරුවන් දෙදෙනා අවුරදු 36 සහ 42 හැවිරිදි ගන්දර හා කළුවාමෝදර ප්‍රදේශයේ පදිංචිකරුවන් වන අතර, සැකරුවන්ගෙන් සිදුකළ ප්‍රශ්න කිරීම්වලදී එම භාණ්ඩ රුපියල් කෝටි 03කට අලෙව් කිරීමට සූදානම් කර තිබූ බවට අනාවරණය වී තිබේ.  මෙම භාණ්ඩ අතර විවිධ පාට ගල් 12කින් යුත් කුඩා කරඬුවක්, විවිධ පාට ගල් 04කින් යුත් රන් පලඳනාවක් හා කුඩා රන් පැහැති ආභරණයක්, විවිධ ගල් 06කින් යුත් රන් පැහැති පලඳනාවක්, පාට ගල් 08කින් යුත් කුඩා ආභරණයක්, පාට ගල් 07කින් යුත් රන් පැහැති කුඩා පලඳනාවක්, ස්කෑනර් යන්ත්‍රයක්, පුරාවි වටිනාකමක් ඇති බවට සැකකරන විවිධ සංකේත හා අක්ෂර යොදා ඇති කිලෝ එකයි ග්‍රෑම් පන්සියය හා  ග්‍රෑම් දෙසිය පනහේ බර කළුගලකට සමාන ඝන වස්තු දෙකක්, අගල් 07ක් දිග හා අගල් 02ක් පළල පැරණි අක්ෂර හා සංකේත කොටා ඇති අගල් භාගයක ඝනකමින් යුත් ශෛලමය සෙල්ලිපියක් අත්අඩංගුවට ගෙන තිබෙන බවද පොලිස් මූලස්ථානය සඳහන් කරයි.
ඉන්දික හේවාවිතාරණ

ඔබේ ප්‍රතිචාරය කුමක්ද?

Read Other News

Leave a Reply